هيندوستان؛ ميصير؛ آفريقا؛ چين؛ و ژاپون دونيانين لاپ چوخ جوذاملي يئرلري ساييلير. يالنيز هيندوستاندا بئش ميليون جوذاملي واردير. هر ايل بئش يوز كيشي بو سايا آرتماقدادير. ايرانين لاپ چوخ جوذاملي بؤلگه سي آذربايجاندير. جوذام ويروسو ميصيردن؛ عثمانلي تورپاغينا اورادان آذربايجانا ياييلمش. بو سوزلر دوكتور محمد حسين مبين؛ جوذاملي آليزلارين معنوي آتاسي نين دئديكلري دير.

آذربايجان شهرلريندن اهر له خلخال لاپ چوخ آليزلي شهردير. آراشديرمالارا گؤره قاراداغين تورپاغي بو ويروسون ياشامينا اويغون دور. ايرانلي جوذاملي لارين اوچوندن ايكيسي آذربايجانلي دير. اؤرنك اولاراق اهر ده مين ايكي يوز كيشي آليزدير. بير حالدا كي فارس بؤلگه سينده يوز سكگيز كيشي؛ اصفهان بؤلگه سينده يالنيز اون دورد جوذاملي آليز واردير.

توپلوموموزدان قوولان بو اينسانلارين تكجه اومودو محمد حسين مبين اولموش. سكسن بير ايل اؤنجه اوخ آتانين اون اوچونده تبريزين چرنداب محله سينده؛ دونيايا گؤز آچان اوشاغين آدي محمد حسين قويولدو. محمد حسين 1319 دان 1329 قدر عائيله سيله بير ليكده كرماندا ياشاديغينا باخماياراق هله ده آذربايجان ميلي حكمومتيندن سؤز گئدنده دئموكراتيك حكومتيميز دئيير. دئموكراتيك حكومتيميز گئدندن سونرا دوكتورلوق فاكولئه سين آذربايجاندا آرادان آپارماق ايسته ييرديلر؛ آما اؤيرنجي لر هر گئجه كئشيك وئريب بو فاكولتني قورودولار و1334 ايلده تبريزده ناصرالدين شاهين گزي يئري اولان بابا باغين جوذاملي آليزلار خسته خاناسينا چئويريب اينديه قدر آذربايجانين هريانيندان؛ اردبيل؛ اورومو؛ زنجان ها بئله تبريزدن گتيريلن آليزلارين ساغالتماسينا چاليشير. دوكتور مبين گئجه لري فانيس يانديريب؛ بولاقدان مريض لره سو داشييب اؤز خالقينين توپلومومدان قوولموش بالالارينا يارديم ائتميش او آليزلاري يالنيز ساغلتماغا يوخ بلكه بير داها توپلوما قايتارماغا جان آتيردي. چوخلارين ساغالديب بير داها اوخولا؛ بيلي يوردونا گؤندردي. ايسلامي آزاد بيلي يوردوندان گيلئي له نير بيزيم اوشاقلارين اوخو هزينه سين تامين ائتمه ديلر. آخي اون اوشاغين هزينه سي اونلارا بير شئي ائتمزدي.

دوكتور محمد حسين مبين دوكتورلوقدان باشقا اينجه دويغولو شاعيردير. اونون آنا ديليميزده چوخلو كيتابي ايشيق اؤزو گؤرموش. كيتابلارينين چوخو اوشاق ادبياتي فونوسونوندادير. اونلاردان ((گل باهاريم؛ گل)) ((قوشلار يوواسي))((لاي لاي ماراليم لاي لاي))((آچيل چتريم؛آچيل)) ها بئله ((جوذاملي سارا)) ني آد آپارماق اولار

شهريار حاقيندا چوخلو مقاله لر يازميش؛ اونلاردان ((شيطان در شعر شهريار))((تبريز گنجينه اي مرده در تاريخ))((نظامي گنجوي))((به ياد شهريار))((قانلي چيچك لر))((عاشيقلار)) ها بئله ((قاپيميز آچيلير گونشه ساري)) ني آد آپارماق اولار:

جوذاملي سارا كيتابيندان بير شعر:

 آرخاسيز آدام سيز

گؤبلك كيمي

داغلارين دؤشونه

دوشدوم بوي آتديم

                                          رنگلر ايچينده

قارا رنگلي له

باختيمين رنگي ني

قارا بويائديم

 بير ياغيش داملاسي

ياراتدي مني

ياغيش سيز قالالي

كول اولدوم يانديم

 بير لحظه ياشاديم

بير عؤمور يانديم

اودلانيب يانماغي

من عؤمور سانديم