«پیشه ورینی کیملر اؤلدوروب» کیتابینین خیانتینه اعتراضلاریم

"بو یازینی ائوین دوستاغینین غرورلو قهرمانی حسین بی حسینی یه سونورام"

ابراهیم رشیدی  ( ساوالان )

پیشه ورینی کیملر اؤلدوروب آدلی کیتابین یازانی محمد مهراب دیر. بو اثر کیتاب یوخ مقاله لر توپلوسودور. مقاله لر بیر قلمدن آخماییب چئشیدلی روحلاری یاشادیر. اؤرنک اولاراق کیتابین سون سؤزو« آزادلیق یولوندا موباریزه» آدلی ایکی جیلدلی کیتابین اؤن سؤزودور. ایلک اؤنجه محمد مهراب آدلی یازازین اولمادیغینی و بو یالنیز تاخما آد اولدوغو بئینیمه گلدی آما سونرا تبریزده سودمند نشری طرفیندن یاییلمیش آذربایجان بایاتیلاری آدلی کیتابین محمد مهراب آدلی یازازینا راستلاشدیم. بو ایکی شخصین بیر اولوب اولماماسی هله ده بیر سورو کیمی یاشاماقدادیر؟

اثرین متنی ایله اؤن سؤزو بیر بیرینه تام قارشی دیر. اؤرنک اولاراق اؤن سؤزده پیشه ورینی روسلارین جاسوسو قدر آلچالدیب یازیر:« مسکووانین اراده سیله دوروب اوتوران پیشه وری اوچون گونئی آذربایجان تماما محوده اولا بیلردی، تکی سوسیالیزم ساغ اولسون" (8-جی یارپاق). آما متنده پیشه وری بیر رهبر کیمی دیرلندیریلیر.

«س.ج پیشه وری» نین اؤلومو گونئی و قوزئی آذربایجانا دگن بؤیوک ضربه ایدی، پیشه وری نین دونیاسینی دگیشدیردیگی ایللر عرضینده اونونلا باغلی علمی، پوپلیسیست اثرلرله یاناشی چوخلو بدیعی اثرلرده یازیلمیشدیر. اونلارین هامیسیندا بیر مطلب مختلف یونتیک   قورمالاردا تکرار اولونور. پیشه وری بؤیوک دموکرات ایدی، او ستارخان، خیابانی کیمی انقلابچی لار نسلی نین لایقلی خلفی و قدرتلی داوامچی سیدیر. س.ج پیشه وری قدرتلی اجتماعی و دولت خادمی، اصل وطن پرور، مرد انسان، متین انقلابچی، هومانیست  شخصیت، اقتدارلی رهبر، استعدادلی پوپلیسیست، گؤزل قلم  صاحب ایدی. (80-جی یارپاق)

باشقا  اؤرنک اولاراق اؤن سؤزده بئله گلمیش:

«پیشه وری ایسه یازیلاریندا رسول زاده نی انگلیس جاسوسو، مساواتچیلاری ایسه قارا گروه آدلاندیریردی» (7-جی یارپاق)

آما 60-جی یارپاقدا پیشه وری نین اؤز الی ایله یازدیغی خاطراتینا دایاناراق یازیر: « ایران سیاستلری و زور ایله غیر روس خلق لری، روس امپراطورلوغونا یاپیشان خلق لر بئله نچی وضعیتدن فایدالاناراق،آذربایجان خلقی ده باشقا  خلق لر کیمی (گورجو،ارمنی) مستقل دولت یاراتدی(1918-1920)

آذربایجانین قاطعیت سسی (رایی) ایله مساوات تشکیلاتی، محمد امین رسولزاده نین رهبریتی  آلتیندا آذربایجان ایلک دموکراتیک جمهوریتی نین تمل داشینی قویموشدور»

آما کیتابین خیانتی باشقا یئرده دیر. اؤن سؤز پروفسور زهتابی نین آدین داشیییر. آشاغیدا گتیره جه ییم ندنلره دایاناراق بو یازی زهتابی نین یازی سی اولا بیلمز. بلکه اؤن سؤزون محترم اولمایان  یازاری اؤز دارتیلمامیش دنین زهتابی آدیلا یازماقدا سؤزونه سس قازانماق فیکرینده ایمیش. اؤن سؤزون یازاری ندن، اؤز تاریخی میزی، اؤز میللی شخص لریمیزی بو راحاتلیغا تحریف ائتمه یه راضیلاشیب؟

بو یازی زهتابی طرفیندن یازیلمادیغینا دؤرد ندنیمیز وار؛

1-دیل باخیمیندان:

 یازی چیلخالاشمیش تورکجه ده،بیر آز تورکییه تورکجه سینه یاخین بیر دیلده یازیلمیش، بیر حالداکی زهتابی نین یازیلاریندا بو فورمادان خبر یوخدور. 1- اؤرنک اولاراق زهتابی بیر بیلگیندن سؤز آپاراندا « آدلیم عالیم میر علی سیدوف» دئییردی آما یازی دا «اونلو سوسیولوق» ایشله دیلمیش. 2- شفاهی اولاراق زهتابی نین اؤز دیلیندن ائشیتمیشم: مجبوریتینده و زوروندا سؤزجوکلرین آراسیندا مجبوریتینده آذربایجان ادبی دیلینده قبول اولونموش عبارتدیر.  آما یازیدا «عبرت آلماق زورونداییق» سؤزونه راستلاشیریق. یانی زهتابی اؤز دئییشینین ترسینه یازمیش؟

3- بولونانلار هابئله بکله مک سؤزجوک لرینین ایشله دیلمه سی،

 بو یازی زهتابی نین اولماماسینا باشقا ندنلردیر. بو اؤن سؤزده بئله سؤزجوکلر چوخ گؤزه چارپیر.

2- اؤن سؤزه حاکیم اولان ذهنیت:

ذهنیت له عینیت تارتیشماسینا کئچمه دن زهتابی نین مسئله لرله نئچه عینی یاناشماغین آچییقلامالییام. زهتابی تاریخ یازاندا عینیت لره سند لره دایاناراق یازاردی. پیشه وری حاققیندا دانیشاندا یالنیز پیشه وری نین آغزیندان چیخان سؤزلره استناد ائدردی. کیمسه نین بئینینده نلر کئچمه احتمالی ایله اونو محاکمه ائتمزدی. ایران اراضی بوتوولویوندن بحث ائدنده پیشه وری نین شیر و خورشید سالونوندا سؤزلرین دقیقا سؤیله ییب حتتا الی ایله پیشه وری نین ال حرکتینده یانسیداردی. آما بو یازی تام ذهنیت لر اساسیندا یازیلمیش و پیشه وری نین  بئینیندن بلکه نلر کئچیرمیش لری محاکمه ائدیر. منجه بو یازی سوسیال پسیخولوژی بیلگینی طرفیندن یازیلمیش، عینیت لره دایانان بیر تاریخچی طرفیندن یوخ. اؤرنک اولاراق« هر بیر حرکتین یارانماسی اوچون سوسیال انرژی نین تظاهری ایکی ساحه ده ممکن دور» «بیز 21 آذر حادثه سی لیدئرلرینین سیاسی پسیخولوگییاسینی تحلیل ائده رک مسئله یه یاناشماق ایسته ییریک»

بو فورمادا یازی زهتابی دن اوخویان وارمی؟

بو یازی نین بیر پارا قیرافین بوتونلوکله گتیرمک ایسته ییرم؛

« انسان دوشونجه دونیاسینا گؤره تشکیل لنیر، پیشه وری نین دوشونجه دونیاسیندا فورمالاشمیش شعور سیستمی آذربایجان ین تاریخی کیملیگینه،ملی دیر لرینه ضد ایدی. پیشه وری نین فردی تحت الشعورونون، توپلومون سویدان گلن کلکتیو تحت الشعور ایله قطعیا باغلانتیسی یوخ ایدی. اونلارین ملی فطرتلری تخریب اولونموشدور. اونلارین گؤروی بوتون ایراندا زامان ایچه رسینده کمونیزمی برپا ائتمک ایدی. اونلار ژنتیک باخیمدان تورک اولسالاردا، دونیا گؤروشو و تفکر باخیمیندان تورک کیمی، اؤز ایچه رسینده، اؤز روحلاریندا دفن اولموش و کمونیست روس کیمی دیریلمیش انسانلار ایدیلر».

یازارین دوشونجه سین ائلیشتیرمک نیتینده دئییلم، یالنیز بو سؤزلرین بیز تانیدیغیمیز زهتابی نین اولوب اولماماسین اوخوجولارا بیراخیرام. زهتابی هاچان بیر شخصین فردی تحت الشعورون محاکمه یه چکمیش؟ هاچان انسانلارین تفکر باخیمیندان تورک اولوب اولماماسینا فیتوا وئرمیش؟

3- یازی نین دویغو ساللیغی:

زهتابی تجروبه لی هابئله دویغولارین یؤینله میش بیر یازار ایدی، گونئی آذربایجانین تاریخ آتاسی اولدوغو یازیلاریندا فاناتیزمه، دویغویا، نیفرته یول وئرمه مه دیگیندن آسیلی دیر. پیشه وری حاققیندا دانیشاندا نه او گونلرین الده ائتدیکلریندن سئوینیب قانادلانیردی نه ده پوزولماسیندان حسرت چکیب گؤز یاشی توکوردو. یالنیز کئچمیشیمیزی   گنجلریمیزه یئتیرمه یه چابا گؤستریردی.

آما بو یازی باشدان باشا دویغو هابئله نیفرت اساسیندا یازیلمیش. باخین«هئچ اولماسا خوجالی فاجعه سیندن چنگیزین هؤنکورتولری قالدی، 21 آذردن هئچ بیر شئی قالمادی»

«بلی، ستارخانین شهرینه گلن اوردونون ایچینده قورخو واریمیش،ستارخانین روحوندان قورخو»

منجه بو یازی نین اساس ندنی بو سیطره ده گیزله نمیش؟

«او زامان پیشه وری نین چئوره سینده بولونانلار،  بو گونده گونئی آذربایجاندا بیر تورک جمهوریتی یارانماسینا قارشی چیخیرلار»

یازار حتتا دویغوساللیقدان بیر آددیم ایرلی گئدیب گله جک حاققیندادا قطعیت له دانیشیر:«اگر پیشه وری  اؤزوده ساغ  قالسایدی بو گونکو تورک گنجلیگینین استقلال مفکوره سینه قارشی چیخاجاق ایدی»

4-دوشونجه باخیمیندان:

چوخ قیسا شکیلده دئمه لییم اؤلوموندن اون گون اؤنجه آلمانیادا دانیشان زهتابی پیشه وری دن بیر رهبر کیمی آد آپاریب اونون بوتون ایشلرین اونایلاییردی. زهتابی هئچ بیر زامان پیشه وری یه ساختا قهرمان دئییب، اونو تاریخیمیزدن سیلمک فیکرینده اولمامیشدی.

اؤن سؤزون یازاری نین دوشونجه لری نئجه اولدوغو ایله ایشیم یوخدور یالنیز اؤز یازیلاریمیزی کئچمیش قوجامانلارین آدی آلتیندا گنج لره تیخدیرماق باغیشلانیلماز و چیرکین بیر عمل اولدوغونا ایناندیغیمدان بو اعتراضلاری یازدیم.